Быел Татарстанның Милли музеена 115 ел тула. 1895 елның 5 апрелендә Казан халкы өчен фәнни-сәнәгать ядкарьханәсе буларак ачылган музей туган көнен киң колач белән билгеләргә җыена. Юбилей елы кызыклы вакыйгаларга һәм җитди чараларга бай булачак. Бәйрәм чаралары «Бүләкләр тапшыру көне» хәйрия акциясеннән (1-5 апрель) башланды. Ә бүген (5 апрель) Милли музейда Ачык ишекләр көне уздырыла.

     Иртәнге 10нан 18 сәгатькә кадәр төрле экспозиция һәм күргәзмәләр буйлап экскурсияләр оештырыла. Биредә шулай ук «Тере экспозиция» геройлары белән дә очрашырга мөмкин. Милли музейның дүрт мәйданында да берьюлы фондта сакланучы кыйммәтле экспонатларны тамаша кылып булачак. «Ел фасыллары», «Туган як бизәкләре», «Меңъеллык Казанның -музей ядкарьләре», «Гаҗәеп тәнкәләр» - болар барысы да килгән кунаклар хозурына тәкъдим ителгән күргәзмәләр исемлеге.

    12дән 14 сәгатькә кадәр һәркем биредә «Мич янында кунакта», «Хәзинә эзләгәндә», «Һәр аучы белергә тели» дигән музей уеннарында катнаша ала. Музейда эшләүче абый-апалар нәни дусларын да онытмаган, алар өчен дә кызыклы тамашалар оештырыла.

    Матбугат хезмәткәрләре өчен дә очрашуда, каләм ияләренә юбилей елында гамәлгә ашырылачак проектлар, яңалыклар турында бәян ителәчәкләр. «Бүләкләр тапшыру көне» дигән акциягә нәтиҗә дә менә шушы көнне ясала һәм конкурста җиңүчеләргә бүләкләр тапшырылачак.

    Чыганак: intertat.ru